गंगा माता मन्दिर निर्माणमा आर्थिक समस्या, दाताहरुलाई सहयोग गर्न मन्दिर समितिको अपिल

देवचुली

गृहपृष्ठ
देवचुली

गंगा माता मन्दिर निर्माणमा आर्थिक समस्या, दाताहरुलाई सहयोग गर्न मन्दिर समितिको अपिल

ह्याप्पी टाइम्स 2077-10-21

पूर्वी नवलपरासीको देवचुली नगरपालिका १७ पिप्रहरमा रहेको गंगा माता मन्दिर यतिबेला आर्थिक समस्याले निर्माण सम्पन्न हुन सकेको छैन। प्यागोडा शैलीमा निर्माण गरिएको सो मन्दिर निर्माण गर्न हालसम्म ३७ लाख ३८ हजार ९ सय ९६ रुपैंया खर्च भैसकेको छ। नेपाल धर्मनिरपेक्ष राष्ट्र घोषणा भएकै दिन देवचुली १७ निवासी भिमलाल पौडेलले हिन्दु धर्मको संरक्षण गर्न सो मन्दिर निर्माणको संकल्प लिएको संकल्पकर्ता पौडेलले बताउनुभयो। २०७५ मंसिर ४ गते देवचुली नगरपालिकाका नगरप्रमुख पूर्णकुमार श्रेष्ठले शिलान्यास गर्नुभएको सो मन्दिर शिलान्यासको एकबर्ष पछी मात्रै निर्माण थालिएको थियो। तीन कठ्ठा क्षेत्रफलमा फैलिएको मन्दिर परिसरमा होमनकुण्ड र ॐकारेश्वर ज्योतिर्लिंग समेत निर्माण हुनेछ। सो क्षेत्रलाई धार्मिक पर्यटनको रुपमा बिकास गर्न वडा कार्यालयले पहल गरिरहेको वडा नं १७ का वडाध्यक्ष विष्णु प्रसाद आचार्यले बताउनुभयो। मन्दिर निर्माण स्थल मध्यवर्ती क्षेत्रमा पर्ने भएकाले बिकास निर्माणका काम गर्दा निकुञ्ज प्रशासनलाई जानकारी गराउनुपर्ने बताउँदै स्थानिय तिलक बहादुर थापाले स्थानियको हितको कार्य गर्न निकुञ्ज सधैं सकारात्मक रहेको बताउनुभयो।

No description available.

मन्दिर निर्माणमा स्थानियको सक्रियता भएता पनि पछिल्लो समय मन्दिर सम्पन्न गर्न आर्थिक समस्या हुँदै आएको छ। मन्दिर रंगरोगन, कम्पाउण्डिङ, शिवलिंग स्थापना लगायतका काम बाँकी नै रहेकाले आर्थिक सहयोगका लागि मन्दिर ब्यवस्थापन समितिका अध्यक्ष चन्द्र प्रसाद तिवारीले दाताहरुलाई आग्रह गर्नुभयो। नवलपुरमा पर्यटन प्रवर्द्धनका लागि बेलाबेलामा विभिन्न बहस र अन्तरक्रिया हुँदै आएका छन् । नारायणी नदी र चितवन राष्ट्रिय निकुन्जको समिपमा निर्माणाधीन गंगामाता मन्दिरले धार्मिक पर्यटनको पक्कै पनि बिकास गर्नेछ। त्यसैले पनि उक्त मन्दिर निर्माण सम्पन्नका लागि हरेक तह र तप्काका सरोकारवालाहरुले भुमिका खेल्नु पर्ने हुन्छ। आउनुहोस्,हातेमालो गरौं, पवित्र गंगामाता मन्दिर निर्माणलाई सम्पन्न गरौं।

प्रकाशित मिति: बुधबार, माघ २१, २०७७ १२:०२