छैटौं देवचुली महोत्सव: अर्जुनको 'झलीको' सुन्न ऐतिहासिक भिड, सिन्धुली कलाघरको पृथक प्रस्तुति

देवचुली

गृहपृष्ठ
देवचुली

छैटौं देवचुली महोत्सव: अर्जुनको 'झलीको' सुन्न ऐतिहासिक भिड, सिन्धुली कलाघरको पृथक प्रस्तुति

आदर्श सुशिल बुधबार, माघ ७, २०८२

छैटौं देवचुली महोत्सवमा अहिलेका चर्चित गायक अर्जुन सापकोटाको "झलीको" लगायतका गीत सुन्न दर्शकहरूको ऐतिहासिक उपस्थिति रह्यो। ढिलो गरी मञ्चमा उक्लिएका अर्जुनलाई गीत गाइरहेका बेला दर्शकले अङ्कमाल गर्न पुगे र गीत गाइसकेपछि पनि दर्शकहरुबाट फोटो सेसनका लागि घेरिइरहे। महोत्सवमा हालसम्मका दिनमा सबैभन्दा धेरै दर्शक उपस्थित रहेको दिनमा अर्जुनले आफ्ना चर्चित गीतहरू झलिको, बस्यौ अलग्गै, पछ्यौरी लिस्यो, लगायतका आधा दर्जनभन्दा बढी गीत गाएका थिए। अर्जुनसँगै गायिका दुर्गा सापकोटाले पनि आफ्नो प्रस्तुति दिएकी थिइन्। त्यो सँगै सिन्धुलीबाट आएका सिन्धुली कलाघरका कलाकारहरूले मौलिक नृत्य गायन र विभिन्न गतिविधिहरु प्रदर्शन गरेका थिए। मङ्गलबार महोत्सव परिसरमा विद्यालय स्तरीय हाजिरी जवाफ प्रतियोगिता समेत सञ्चालन गरिएको थियो। सदा जस्तै देवचुली डान्स आइडलका कार्यक्रमहरु पनि सञ्चालन भएका थिए।

महोत्सवको औपचारिक कार्यक्रमको अध्यक्षता देवचुली उद्योग वाणिज्य सङ्घका अध्यक्ष सत्यनारायण भुसालले गर्नुभएको थियो भने कार्यक्रममा देवचुली नगरपालिकाका प्रमुख प्रशासकीय अधिकृत अशोक कोइरालाको प्रमुख आतिथ्यता रहेको थियो। कार्यक्रममा नगरपालिकाका लेखा अधिकृत नारायण ढकालको समेत उपस्थिति रहेको थियो। उद्योग वाणिज्य सङ्घका पूर्व अध्यक्ष रेशमलाल सापकोटाको स्वागत मन्तव्य रहेको कार्यक्रमको सञ्चालन सङ्घकी महासचिव तिलादेवी न्यौपानेले गर्नुभएको थियो। सांगीतिक कार्यक्रमको सञ्चालन भने उद्घोषक तथा कलाकार दिपक खड्काले गर्नुभएको थियो ।