छैटौं देवचुली महोत्सव: अनुले गाइन्, नचाइन् र धुलो उडाइन्

देवचुली

गृहपृष्ठ
देवचुली

छैटौं देवचुली महोत्सव: अनुले गाइन्, नचाइन् र धुलो उडाइन् भजन प्रतियोगितामा शिवहरी भजन समूह प्रथम

आदर्श सुशिल शुक्रबार, माघ २, २०८२

नेपाली तथा थारु गीतमा निकै चर्चित गायिका अनु चौधरीले बिहीबार छैटौँ देवचुली महोत्सवको सातौं दिनमा आफ्ना बहुचर्चित गीतहरू गाएर दर्शकलाई नचाएकी छिन्। उनले नेपाली र थारु भाषाका आधा दर्जनभन्दा बढी गीत गाइन् । उनीसँगै बिहिबार भजन गायक सुरज भण्डारी र कौरा गायक नवराज थापा मगरको प्रस्तुति रहेको थियो। साथमा भजन प्रतियोगिताको समेत आयोजना गरिएको थियो। भजन प्रतियोगितामा शिवहरी भजन समूह देवचुली ९ प्रथम, देवचुली भजन समूह देवचुली ४ दोस्रो, सकलादेवी मावि भजन समूह देवचुली ५ तेस्रो र सक्रिय भजन समूह देवचुली १२ सान्त्वना हुन सफल भएको छ । भजन प्रतियोगितामा कुल नौवटा समूहको सहभागिता रहेको थियो। बिहीबार देवचुली डान्स आइडल र अन्य नृत्यका कार्यक्रमहरू पनि सञ्चालन भएका थिए।

हरेक दिन जस्तै बिहिबार पनि देवचुली उद्योग वाणिज्य सङ्घका अध्यक्ष सत्यनारायण भुसालले कार्यक्रमको अध्यक्षता गर्नुभएको थियो। कार्यक्रममा संघका संस्थापक अध्यक्ष धर्मराज बस्यालको प्रमुख अतिथ्यता रहेको थियो। कार्यक्रममा नवलपुर जिल्लाका प्रमुख जिल्ला अधिकारी भविश्वर पाण्डे, प्रहरी उपरीक्षक युवराज खड्का, सशस्त्र प्रहरी नायब उपरीक्षक लक्ष्मण बराल, अनुसन्धान निर्देशक अभिनय कुमार सिंह लगायतको उपस्थिति रहेको थियो। उद्योग वाणिज्य सङ्घका वरिष्ठ उपाध्यक्ष विनोद सिलवालको स्वागत मन्तव्य रहेको कार्यक्रमको सञ्चालन संघकी महासचिव तिलादेवी न्यौपानेले गर्नुभएको थियो। भजन प्रतियोगिता तथा डान्स आइडलको सञ्चालन भने ढुण्डिराज केसीले गर्नुभएको थियो । मञ्चको साङ्गीतिक कार्यक्रमको सञ्चालन गायिका तथा कार्यक्रम सञ्चालक उमादेवी खनालले गर्नुभएको थियो।