चौधरी उद्योगले कामदारको व्यवस्थापन गर्न नसकेपछि उद्योग नै बन्द

देवचुली

गृहपृष्ठ
देवचुली

चौधरी उद्योगले कामदारको व्यवस्थापन गर्न नसकेपछि उद्योग नै बन्द

एलिना केसी 2077-02-04

देवचुली,

देवचुली नगरपालिका वडा नं २ दुम्कौलीमा रहेको चौधरी उद्योग ग्रामले कामदारको व्यवस्थापन गर्न नसकेपछि आइतबारबाट उद्योग नै बन्द गरेको छ । विश्वभर महामारीका रुपमा फैलिएको कोरोना भाइरसका कारण लाखौँले ज्यान गुमाइसकेका छन्। संक्रमणबाट बच्नको लागि नेपाल सरकारले पनि देशलाई नै लकडाउनमा राखेको छ । लकडाउनको समयमा सबै कुरा बन्द रहेको बेला पनि चौधरी उद्योगले ६ सय कामदार राखेर उद्योग संचालन गरे पछि सुरक्षित नभएकाले उद्योग नै छाडेर सबै कामदार घर फर्किएका छन्। केही दिन देखि चौधरी उद्योगमा चलेको आन्दोलनले उद्योग नै बन्द भएको छ । लकडाउनको समयमा उद्योगले २ सय ५५ कामदारलाई काममा लगाउने अनुमती पाए पनि मनपरी ६ सय कामदार खटाएको थियो । ६ सय कामदारहरुलाई व्यवस्थित र सुरक्षित तरिकाले राख्न नसकेपछि भने श्रमीकहरु आन्दोलनमा उत्रिएका थिए । उद्योगमा भारत लगायत कोरोनाको उच्च जोखिम रहेका ठाँउबाट मालबाहल ट्रक आउने गरेकाले आँफुहरु जोखिममा रहेको बारम्बार बताए पनि उद्योगले कुनै चासो नदेखाए पछि भने श्रमीकहरु उद्योग छाड्न बाध्य भएको बताएका छन् ।
शुक्रबार देवचुली नगरपालिकामा बसेको बैठकमा उद्योग पुन संचालन गर्ने र कामदारहरु सबैलाई व्यवस्थित सुरक्षा, खाने, बस्ने र उनीहरुको आरडिटि परीक्षण गर्ने भनिए पनि ६ सय मध्ये १७ जनाको मात्र आरडिटि परीक्षण गरिएको थियो । ६ सय मध्ये जम्मा १७ जनाको मात्र आरडिटि परीक्षण गरि घरमै क्वारेन्टाईनमा बस्नको लागि घर पठाए पछि देवचुली नगरपालिकाका विभिन्न वडाका वासिन्दामा त्रास छाएको छ । सरकारले उद्योग संचालन गरे पनि उद्योगमा काम गर्ने कामदारहरुलाई सुरक्षित राख्नुपर्ने भनिएता पनि देवचुलीको चौधरी उद्योगले भने श्रमीकहरुको स्वास्थ्य प्रति लापरबाही गरेको छ । बिना परिक्षण कामदार घर फर्किएपछी सामाजिक सञ्जालमा चर्को बिरोध भएको छ। चाउचाउ अत्यावश्यक वस्तुमा नपर्ने भन्दै चौधरी उधोगको जिम्मेवारी बिहिन कार्यको चौतर्फी बिरोध भएको छ। उद्योगले श्रमीकहरु माथि गरेको व्यवहारलाई देवचुली नगरपालिकाले देखेर पनि नदेखे जस्तो गरेको मजदुरहरु बताउँछन् ।
नेपालमा दिनदिनै कोरोना संक्रमितको संख्या बढीरहेको र कोरोनाले मृत्युसमेत भैसक्दा पनि चौधरी उधोगको लापरबाहीले कोरोना संक्रमण हुन सक्ने भन्दै नगरबासी र स्वास्थ्यकर्मी त्रसित बनेका छन् । स्वास्थ्यको दृष्टिकोणले ६ सय भन्दा धेरै मजदुर मध्ये १७ जनाको मात्रै आरडिटि परीक्षण गरिनु जोखिमपूर्ण रहेको दुम्कौली प्राथमिक स्वास्थ्य केन्द्रका डा। अशिषबाबू अर्यालले बताउनुभयो । श्रमीकहरुलाई १४ दिन क्वारेनटाईनमा राखेर स्वाव परीक्षण गरेर मात्र घर पठाउनुपर्ने अर्यालको भनाई छ । यसरी सबै श्रीमकहरु परीक्षण बिना पैंदल घर जाँदा घरपरिवार र स्थानीयमा समस्या आउने उहाँको भनाई थियो ।
यस्तै चौधरी उद्योगका प्रमुख रामकाजी सिटौलाले देवचुली नगरपालिकाले पर्याप्त किट उपलब्ध नगराएकाले १७ जनाको मात्र आरटिडि परीक्षण गरिएको बताएका छन् ।
यस विषयमा देवचुली नगरपालिका केही बेरमा बैठक बस्ने बताईएको छ ।

प्रकाशित मिति: आइतबार, जेठ ४, २०७७ १२:०५