दलदले–मुण्डे सडकखण्डको बजार क्षेत्रको नाला निर्माणमा स्थानीयको असन्तुष्टि

देवचुली

गृहपृष्ठ
देवचुली

दलदले–मुण्डे सडकखण्डको बजार क्षेत्रको नाला निर्माणमा स्थानीयको असन्तुष्टि

एलिना केसी बिहीबार, जेठ ११, २०८०

देवचुली,

देवचुली नगरपालिकाको मुख्य बजारमा पर्ने दलदले–धौवादी सडकखण्डको स्तरोन्नतीको कार्य धमाधम सुरु भएको छ । अहिले दलदले चोक देखि उत्तरपट्टिको बायाँतर्फको नाला निर्माण कार्य धमाधम भइरहेको छ । मापदण्ड अनुसार सडकलाई २० मिटर निर्माण गर्ने प्रक्रिया अगाडि बढाएपनि हाल १३ मिटर बराबरको नाला र सडक बनाइदै छ । बन्दै गरेको नालाको चौडाई सवाँ मिटर रहेको छ भने उचाइ ९० से.मि रहेको छ र पानी बग्ने भाग ६० से.मिको रहेको छ ।
अहिले दलदले बजारदेखि कुमसोत जाने सडक छेउछाउ नाला निर्माण धमाधम सुरु भएपनि दलदलेका स्थानीय भने त्यति सन्तुष्टि देखिदैनन् । दलदले बजारको मुख्य बाटो स्तोरोन्नतीको कार्य चलाउँदै गर्दा यहाँका स्थानीयसँग समन्वय नगरि नाला निर्माण कार्य गरेको भन्दै आपत्ती जनाएका छन् ।
बजार संगै सबै कुराको व्यवस्थापन गर्नु सकारात्मक पक्ष भएपनि नाला निर्माण उपयुक्त ढंगले नभएको स्थानीय अशोक अधिकारीले बताएका छन् । नाला निर्माण गुणस्तरको बिषय भन्दापनि वर्र्खायाममा पानी सहज रुपमा बग्ने नदेखीएको र ढललाई निकासा गर्न गाह्रो हुने जस्ता कारणले डुबानको समस्या हुने देखिएको अधिकारी बताउँछन् । यहि मोडालिटीमा नाली बन्दा भविष्यमा पार्किङमा समेत समस्या हुने उनको भनाई छ ।
नाला बनेको राम्रो काम भएता पनि हाल बनिरहेको घरहरुको सतह भन्दा माथि भएकाले डुबान हुनसक्ने अवस्था रहेको अर्का स्थानीय प्रभात न्यौपाने बताउँछन् ।
नाला कस्तो बन्दै छ भन्ने बिषयको मोडालिटीको बारेमा यहाँका स्थानीय अन्यौलतामा रहेको स्थानीय खुमलाल भुर्तेलको भनाई छ । भित्रि सडकहरु धेरै रहेकाले त्यसमा हेभी सवारी साधनहरु गुड्दा समस्या उत्पन्न हुने पो हो कि भन्ने चिन्ता लागेको उनी बताउँछन् ।
गण्डकी प्रदेश भौतिक पूर्वाधार, शहरी विकास तथा यातायात व्यवस्था मन्त्रालयको आर्थिक बर्ष २०७९–०८० को बार्षिक कार्यक्रम अनुसार दलदले –कुमसोत डबल लेन सडक निर्माण योजनाका लागि साढे २ करोड रकम विनियोजित भएको थियो । तत्कालको बजेट अल्पकालिन र पर्याप्त नभएकाले हाल बिनियोजित रकम अनुसार नै काम हुदै जाने देवचुली नगरपालिका वडा नं १३ का वडाध्यक्ष एकदेव पौडेलले बताउनुभएको छ । स्थानीयबासीमा बाटो २० मिटर कायम नभएको भन्ने बुझाई भएपनि नगरपालिकाले मापदण्ड अनुसार सडकको काम अगाडि बढाइरहेको उहाँले बताउनुभएको छ । वडाध्यक्षका अनुसार नाला निर्माणको अनुगमन जिल्ला पूर्वाधार कार्यालय कावासोतीबाट निरन्तर भइरहेको बताउनुभएको छ ।
दलदले बजारलाई भविष्यमा राम्रो गराउने मुख्य उद्धेश्यका साथ बाटो निर्माणलाई तिव्रता दिइएको छ । राजमार्गबाट दलदलेको उत्तर तिरको उचाइ बढ्दै गइरहेकाले पुराना घरहरु सडक भन्दा तल हुने अवस्था देखिएको छ । सोही कुराले यहाँका स्थानीयमा निराशा छाएको छ । तर सडक जुन तरिकाले बनाइएको छ सोही अनुरुप नालाको डिलसम्म पुरेर त्यसलाई बराबर स्तरमा बनाईने योजना पूर्वाधारको रहेको छ । आगामी मंसिर सम्म भित्र यो योजना सम्पन्न गर्नुपर्ने लक्ष्यमा रहेको छ ।
विगतका बर्षहरुको बर्खायाममा देवचुली नगरपालिकाको उत्तरी भेगबाट बग्ने टोक्रे खोला, देउसत खोला र बौलाहा खोलाको नहरबाट खेतबारी सम्म आउने स–साना कुलोहरुबाट ओभरफ्लो भई आएको बाढीले बजार क्षेत्र डुबानमा पर्ने गथ्र्याे । जसले गर्दा जनधनको क्षति त भइरहेको थियो नै तर पानी बग्ने ६० से.मिको निर्माणधिन नालाले बर्खायामको बाढी नथेग्ने भएकाले झनै समस्यामा पार्ने होकि भन्ने चिन्ता यहाँका स्थानीय एवम् बजार व्यवसायीहरुमा रहेको छ ।

प्रकाशित मिति: बिहीबार, जेठ ११, २०८० १४:५४