अमरापुरी खानेपानी संस्थामा एक सदस्यबाहेक तिमिल्सेना प्यानल विजयी

गैंडाकोट

गृहपृष्ठ
गैंडाकोट

अमरापुरी खानेपानी संस्थामा एक सदस्यबाहेक तिमिल्सेना प्यानल विजयी तिमिल्सेना र ढकालको मतान्तर ४४

आदर्श सुशिल आइतबार, माघ २७, २०८१

नवलपुरको गैंडाकोटमा रहेको अमरापुरी खानेपानी तथा सरसफाई उपभोक्ता संस्थाले तीन वर्षे कार्यकालको लागि नयाँ नेतृत्व पाएको छ। गैंडाकोट १४-१७, अमरापुरीमा सेवाक्षेत्र रहेको संस्थाको शनिबार सम्पन्न आठौं अधिवेशन अन्तर्गतको निर्वाचनमा अध्यक्ष पदमा गोविन्दराज तिमिल्सेना प्यानलले एक सदस्यबाहेक सबै पदमा जीत हासिल गरेको छ। अध्यक्ष पदमा गोविन्दराज तिमिल्सेनाले आफ्ना निकटतम प्रतिद्वन्दी श्याम नारायण ढकाललाई ४४ मतान्तरले पराजित गर्नुभएको हो। मतदानमा तिमल्सेनाले ५ सय ९५ मत ल्याउँदा उहाँका प्रतिद्वन्दी ढकालले ५ सय ५१ मत प्राप्त गर्नुभएको थियो। यसैगरी उपाध्यक्ष पदमा तुलसी पाण्डेले निता शर्मालाई ६३ मतले पराजित गर्नुभयो । पाण्डेले ५ सय ९३ र शर्माले ५ सय ३० मत प्राप्त गर्नुभयो । सचिव पदका लागि उम्मेदवार बन्नुभएका चन्द्रप्रसाद पराजुलीले ६ सय ४ मत प्राप्त गर्दा उपविजेता बन्नुभएका कमलप्रसाद सापकोटाले ५ सय २७ मत प्राप्त गर्नुभयो। उहाँहरूको मतान्तर ७७ रहेको थियो। यसैगरी सह-सचिवमा १ सय ६७ मतान्तर सहित मञ्जु आले थापा मगरले जीत हात पार्नुभयो । उहाँका प्रतिद्वन्दी विष्णु जैसीले ४ सय ७० मत प्राप्त गर्नुभएको थियो।

475407602_2142908936193078_4559987144654637738_n-1739070935.jpg

दलित महिला सदस्य पदमा तिमल्सेना प्यानलकी माया नेपालीले लक्ष्मी नेपालीलाई पराजित गर्नुभयो । माया नेपालीले ६ सय ३७ मत प्राप्त गर्दा लक्ष्मी नेपालीले ४ सय ६७ मत प्राप्त गर्नुभएको थियो। वडा ब्लक अन्तर्गतको वडा नम्बर १४ को वडा सदस्य पदमा भने श्याम नारायण ढकाल प्यानलका तुलसीराम शर्माले गोविन्दराज तिमिल्सेना प्यानलका मदन कंडेललाई पराजित गर्नुभयो । शर्माले १ सय २८ मत प्राप्त गर्नुभयो भने कंडेलले १ सय २ मत मात्रै प्राप्त गर्नुभयो। वडा नम्बर १५ को वडा ब्लक सदस्यमा मणिनाथ कंडेललाई विष्णुप्रसाद राणाभाटले पराजित गर्नुभयो । रानाभाटले २ सय ८२ मत प्राप्त गर्नुभयो भने कंडेलले १ सय २९ मत प्राप्त गर्नुभयो। वडा नम्बर १६ को वडा सदस्य ब्लकका उम्मेदवार टिकाराम कंडेलले १ सय ६५ मत प्राप्त गरी कृष्णप्रसाद सापकोटालाई पराजित गर्नुभयो । सापकोटाले १ सय १५ मत प्राप्त गर्नुभएको थियो। वडा नम्बर १७ को वडा ब्लक सदस्यमा दीपक पौडेलले १ सय १३ मत प्राप्त गरी जीत हात पार्नुभयो । उहाँका निकटतम प्रतिद्वन्दी कृष्णबहादुर भण्डारीले ८६ मत प्राप्त गर्नुभयो। लेखा संयोजक पदमा तिमिल्सेना प्यानलकै विजय अधिकारीले एक सय ८६ को भारी मतान्तरले ढकाल प्यानलका विष्णुप्रसाद सापकोटालाई पराजित गर्नुभयो । अधिकारीले ६ सय ४६ र सापकोटाले ४ सय ५९ मत प्राप्त गर्नुभएको थियो।

खानेपानी संस्थाको नयाँ कार्यसमितिमा कोषाध्यक्ष पदमा कमला गुरुङ, जनजाति महिला सदस्यमा अमृता सोमै मगर, लेखा सदस्य खुलातर्फ वासुदेव खनाल र लेखा सदस्य महिलातर्फ अनिता शाही निर्विरोध निर्वाचित भइसक्नुभएको थियो । नयाँ नेतृत्व चयनका लागि खेमप्रसाद सापकोटाको संयोजकत्वमा विष्णु प्रसाद काफ्ले र जीतबहादुर गुरुङ सदस्य रहने गरी तीन सदस्यीय निर्वाचन समिति गठन गरिएको थियो।

आठौं अधिवेशन अन्तर्गतको निर्वाचनमा गोविन्दराज तिमिल्सेना प्यानल नेपाली कांग्रेस, नेकपा एमाले र राष्ट्रिय प्रजातन्त्र पार्टीको संयुक्त उम्मेदवारको रुपमा चुनावी मैदानमा हुनुहुन्थ्यो भने श्याम नारायण ढकाल नेकपा माओवादी केन्द्र, राष्ट्रिय स्वतन्त्र पार्टी, जनमोर्चा नेपाल र नेपाल कम्युनिस्ट पार्टीको संयुक्त उम्मेदवारको रुपमा प्रतिस्पर्धा गरिरहनु भएको थियो। शनिबार राती ८ बजेबाट सुरु भएको मतगणना आइतबार बिहान ४ बजे सम्पन्न भएको निर्वाचन समितिका सदस्य विष्णुप्रसाद काफ्लेले जानकारी दिनुभयो ।

प्रकाशित मिति: आइतबार, माघ २७, २०८१ ०९:०४