कालिका मध्यवर्ती वनबाट विदा भए वन हेरालु पाण्डे

देवचुली

गृहपृष्ठ
देवचुली

कालिका मध्यवर्ती वनबाट विदा भए वन हेरालु पाण्डे

आदर्श सुशिल शुक्रबार, चैत ३०, २०८०

देवचुली,

नवलपुरको देवचुली नगरपालिकामा रहेको कालिका मध्यवर्ती सामुदायिक वन उपभोक्ता समूहले वनका हेरालु काशीराम पाण्डेलाई विदाई गरेको छ। विगत १३ वर्षदेखि मध्यवर्ती सामुदायिक वनको हेरालुका रुपमा काम गर्दै आउनुभएका काशीराम पाण्डे शुक्रबारबाट बिदा हुनुभएको छ। कालिका मध्यवर्ती सामुदायिक वन उपभोक्ता समूहले वन समूहको कार्यालयमा एक कार्यक्रमको आयोजना गरी हेरालु पाण्डेलाई विदाई गरेको हो।

सामुदायिक वनमा वन हेरालुका रुपमा रहेका पाण्डेले आफ्नो कार्य अवधिमा वनको संरक्षण, स्थानीय उपभोक्तासँगको सम्बन्ध, वन्यजन्तुको संरक्षण एवं मध्यवर्ती क्षेत्रमा वन्यजन्तुबाट हुने बालीनाली नोक्सानी समेत कम गर्न महत्वपूर्ण भूमिका खेलेको भन्दै वन समितिले पाण्डेलाई धन्यवाद सहित बिदा गरेको छ। विदाई कार्यक्रममा संस्थाका अध्यक्ष सुदर्शन लामिछाने लगायत वन समिति परिवार र कर्मचारीहरूको उपस्थिति रहेको थियो।

कार्यक्रममा बोल्दै अध्यक्ष लामिछानेले वन हेरालु पाण्डेले आफ्नो सेवा अवधिमा एक कर्मचारी मात्र नभई एक सफल संरक्षणकर्मीका रुपमा कार्य गरेको चित्रण गर्नुभयो । वन हेरालु पाण्डेलाई कालिका मध्यवर्ती सामुदायिक वन उपभोक्ता समूहले अबिर लगाएर खादा ओढाई नगदसहित सम्मानसमेत गरेको थियो। वन समितिले पाण्डेलाई विदाईसँगै नयाँ वन हेरालुका रुपमा समूहकै उपभोक्ता टेकराज भुजेललाई स्वागत समेत गरेको छ। सो अवसरमा नयाँ वर्ष २०८१ सालको उपलक्ष्यमा शुभकामना आदानप्रदान समेत गरिएको छ।

प्रकाशित मिति: शुक्रबार, चैत ३०, २०८० १५:४७