सुकुम्बासी संघर्ष समितिले बुझाए प्रशासन र वन कार्यालयमा ज्ञापन पत्र

देवचुली

गृहपृष्ठ
देवचुली

सुकुम्बासी संघर्ष समितिले बुझाए प्रशासन र वन कार्यालयमा ज्ञापन पत्र

आदर्श सुशिल शुक्रबार, कात्तिक २८, २०८२

देवचली, कार्तिक–२८,

वर्षौंदेखिको सुकुम्बासी समस्यालाई वडा तहबाट समाधान गर्ने प्रक्रियामा अगाडि बढेका देवचुली नगरपालिकाका सुकुम्बासी संघर्ष समितिले बिहिबार जिल्ला प्रशासन कार्यालय र डिभिजन वन कार्यालयमा ज्ञापनपत्र बुझाएका छन्। सुकुम्बासी संघर्ष समिति देवचुली नगरपालिकाका अध्यक्ष धनबहादुर लुङ्गेलीको नेतृत्वमा प्रशासन कार्यालयमा पुगेका पाँच दर्जन बढी सुकुम्बासीहरूले आफ्ना समस्या प्रमुख जिल्ला अधिकारी भविश्वर पाण्डे समक्ष राखेका छन्। संघर्ष समितिको टोलीलाई नेतृत्व गरेका पाँचजना अगुवाहरूले प्रमुख जिल्ला अधिकारी पाण्डेसमक्ष सुकुम्बासीका समस्या र समाधानका लागि गरिएको पहल कदमीका बारेमा छलफल समेत गरेका छन्। संघर्ष समितिका अध्यक्ष लुंगेलीले संविधानमा लेखिएको नैसर्गिक अधिकार प्राप्तिका लागि पटकपटक विभिन्न चरणमा विभिन्न तह र तप्काका व्यक्तिहरुसँग वार्ता गरिए पनि निकास पाउन नसकेपछि बाध्य भएर देवचुली नगरपालिकाका पाँचवटा सामुदायिक वनमा तालाबन्दी गर्नुपरेको बताउनुभयो । उहाँले नगरभित्रका अमर ज्योति सामुदायिक वन, अमर सामुदायिक वन, धुसेरी सामुदायिक वन, चौतारी सामुदायिक वन र बरटाँडी सामुदायिक वनमा तालाबन्दी गरिएको बताउनुभयो ।

संघर्ष समितिका अर्का अगुवा भीमचन्द्र गुरुङले आँफूहरुले प्रशासन कार्यालयलाई अभिभावक संस्था र प्रमुख जिल्ला अधिकारीलाई अभिभावकका रुपमा लिएकाले वनमा लगाइएको ताला चाबी र ज्ञापनपत्र बुझाउन आएको बताउनुभयो। यद्यपि प्रमुख जिल्ला अधिकारी पाण्डेसँगको छलफलमा समस्याको समाधानका लागि जिल्ला स्थित डिभिजन वन कार्यालयको पहल कदमी हुनुपर्ने निष्कर्ष सहित संघर्ष समितिले ताला चाबी भने फिर्ता लिएको छ। ज्ञापनपत्र बुझ्दै प्रमुख जिल्ला अधिकारी पाण्डेले लामो समयदेखि जग्गा प्राप्तिको लागि संघर्ष गर्दै आएका सुकुम्बासी संघर्ष समितिको माग जायज रहेको बताउँदै समस्या समाधानका लागि सम्बन्धित निकायले न्यायसंगत ढंगले निकास निकाल्नुपर्ने बताउनुभयो ।सुकुम्बासी संघर्ष समितिले जिल्ला प्रशासन कार्यालयसँगै डिभिजन वन कार्यालयमा समेत ज्ञापनपत्र बुझाएका छन्।