दुम्कोलीमा स्कुल भ्यान र एम्बुलेन्स ठोक्किएर दुर्घटना, एकको मृत्यु, पाँच जना घाइते

देवचुली

गृहपृष्ठ
देवचुली

दुम्कोलीमा स्कुल भ्यान र एम्बुलेन्स ठोक्किएर दुर्घटना, एकको मृत्यु, पाँच जना घाइते

हेर्नेपाटी सोमबार, जेठ १९, २०८२

नवलपुर, १९ जेठ २०८२
नवलपुरको देवचुली नगरपालिका–२ दुम्कौली चोकस्थित पूर्व–पश्चिम राजमार्गमा सोमबार बिहान भएको सवारी दुर्घटनामा एक जनाको मृत्यु हुनुका साथै पाँच जना घाइते भएका छन्। जिल्ला प्रहरी कार्यालयका अनुसार बुटवलबाट नारायणघाटतर्फ बिरामी लिएर जाँदै गरेको ना ४ च १६४६ नम्बरको एम्बुलेन्स र रजहर चोकबाट दुम्कौलीतर्फ आउँदै गरेको दिव्य एकेडेमी, केउरेनीको बा २० च ७२ नम्बरको स्कुल भ्यान एकआपसमा ठोक्किँदा दुर्घटना भएको हो।

दुर्घटनामा देवचुली नगरपालिका–१ निवासी ५२ वर्षीय स्कुल भ्यान चालक कुलप्रसाद सुवेदी गम्भीर घाइते भई उपचारको क्रममा पुरानो मेडिकल कलेज भरतपुर, चितवनमा मृत्यु भएको प्रहरीले जनाएको छ। दुर्घटनामा एम्बुलेन्समा सवार ३६ वर्षीया लक्ष्मी राई (बुटवल उपमहानगरपालिका–३ गोलपार्क), २५ वर्षीया इसु राई र २५ वर्षीया स्नेहा परियार घाइते भएका छन्। उनीहरूको टाउको र अनुहारमा चोट लागेको र अवस्था मध्यम रहेको प्रहरीले जनाएको छ। घाइतेहरूलाई थप उपचारका लागि मनकामना अस्पताल, चितवन पठाइएको छ।

त्यस्तै, दुर्घटनामा सामान्य घाइते भएका दिव्य एकेडेमीका विद्यार्थी देवचुली–१७ निवासी १० वर्षीया आयुषा गौतम र ६ वर्षीया सोखनिया रोक्कालाई स्थानिय भविष्य पोलीक्लिनिकमा सामान्य उपचारपछि डिस्चार्ज गरिएको प्रहरीले जनाएको छ। दुर्घटनापछि एम्बुलेन्समा सवार बिरामीलाई अर्को एम्बुलेन्समार्फत चितवन पठाइएको छ। दुर्घटनाको थप अनुसन्धान भइरहेको जिल्ला प्रहरी कार्यालय नवलपुरले जनाएको छ।